Home Poems የወራቶች ወግ

የወራቶች ወግ [ግጥም-በወንድማገኝ አዲስ]

የሆነ ጥግ ይዘው
ጠረጴዛ ከበው
3ቱ አንጋፋ ወራት
በጥልቀት በስፋት
አንዱን እያነሱ አንዱን እየጣሉ
መስከረም የካቲት ግንቦት ያወጋሉ
ባገራቸው ጉዳይ ይነታረካሉ
ታዲያ ከመሀል ላይ እያወጉ ሳሉ

ድንገት አያ ግንቦት የካቲትን አለው
የካቲት ወዳጄ መሀል ላይ ያለኸው
አብዮት መለኮስ ትወዳለህ አሉ
ባንተ ነው እኩያን የሚፈለፈሉ
አንድ ጊዜ ፋሽስቱ አንድ ጊዜ ዘረኛው
ለምንድነው ካንተ ሁልጊዜ መገኛው
ሁሉ ወራት ታልፎ አንተ ጋ ሲደረስ
ለምን ይሆን ከቶ ሁሉ ሚደፈርስ
ያለፈው ሳይበቃ ዙፋኑን ነቅናቂው
የኋለኛው ይባስ አንድነት ፈልቃቂው

አበደ የካቲት
ከግር እስከራሱ ክፉኛ ገልምጦት
መለሰ በቁጣ አንት የሚሉህ ግንቦት
ግን ትንሽ አታፍርም እኔን ስትሞግት
አወይ አለማፈር ወይ መካሪ ማጣት
አገር ሁሉ ሚያቅህ አይደለም ወይ በልቂት
ንፁሁ ሚረሸን ተማሪው ሚገደል
አይደለም ወይ ባንተ የሚጠና በደል
ደሞ እኮ ዘረኛው መንበር የጨበ
ባንተው 20 ነበር የተቆናጠ
ንገሩኝ ካልክማ ይሄ ነው እውነቱ
አልደረቀም ደሙ ከነምልክቱ

ግንቦት በስጨት  አለ ታወከ መንፈሱ
ተው እንጂ የካቲት መች ነበር ጥንስሱ
ያንተ ፅንሶች ናቸው በደል ያደረሱ
በእግጥ በኔ ዘመን ብዙ ህይወት አልፏል
እኔ ባልፈጠርኩት የንፁህ ደም ፈሷል

መስከረም ጀመረ ዝም ብሎ የነበር
ሰከን ስለ ወገን ረጋ ስለሀገር
መፍትሄው አንድ ነው ቀርቦ መነጋገር
ያለፈን ቂም ገድፎ ቅን ሆኖ መጀመር
የየካቲት ዳፋ ለኔም ሳይቀር ተርፏል
ቀጠለ መስከረም ግን ያለፈው አልፏል
አንት ግን የካቲት ስምህ የገነነው
ባድዋ ታሪክ ሰርተህ ባድዋ አደፈረስከው።
ግን ሁሉም ወራቶች ለሀገር ምን ሰራን
በኛ ዝምታ እንጂ ከሀዲ ያፈራን።
ሁሉን ያበላሸ ዝምታና ፍርሀት
በዘር ተበጣጥሶ ለበቀል መበርታት
ካልቆመ አሁኑኑ ህልም ነው ነፃነት
ስለዚህ ወራቶች መናቆሩን ትተን
ባንድነት ጠላት ላይ መነሳት አለብን

የካቲት መለሰ ስለ በጎ ምክርህ
ብሩሁ መስከረም ምስጋና ይድረስህ
የወራቶች መሪ የፀደይ ግንባር ነህ
እኔም ተሰምቶኛል መልካም ንግግርህ
ቃል ገባሁ ታርሜ ልታገል ወንድምህ
እምዬን ጣይቱን አልኩና ማልኩልህ

ግንቦት ተከተለ ትክክል በማለት
ታላቁ መስከረም አንት የፀደይ አባት
ምክርህ የጠራ ነው እንደ ገፅህ ፍካት
ያለፈው ሁሉ አልፏል በኔ ደም ቢፈስም
ከንግዲህ ቀኖቼን ለገዳይ አልፈቅድም
እኔም በበኩሌ እገባለሁ ኪዳን
ለህዝቤ ነፃነት ለሀገሬ መዳን
ከልጆቼ መሀል አብልጬ ከራሴ
እጅግ በምወዳት አስክትጠፋ ነብሴ
እምልልሀለሁ #በግንቦት ስላሴ#

LEAVE A REPLY

Please enter your comment!
Please enter your name here