Home News and Views አንዳንዶች ባይደመሩስ?

አንዳንዶች ባይደመሩስ? [መሳይ መኮንን]

 

እንግዲህ የዶ/ር አብይ ኢትዮጵያ በተስፋ ተሞልታለች። ከውስጥም ከውጭም አንድ ዓይነት ስሜት በኢትዮጵያውያን ልብ ውስጥ ይፍለቀለቃል። የሚታየው የለውጥ ጅምር እውነተኛና ዘላቂ ወደሆነ ለውጥ ያመራል የሚለው ተስፋም እንደብረት ጠንክሯል። በዋሽንግተን ዲሲ ትላንት ያየነው የኢትዮጵያውያን ትዕይንት እንደከዚህ ቀደሙ ‘ሰልፍ’ ተብሎ ብቻ የሚገለጽ አይደለም። ለመጀመሪያ ጊዜ በውጭ የሚኖሩ ኢትዮጵያውያን በተቃውሞ ሳይሆን በድጋፍ፡ በተበላሸ እንቁላል ቀርቶ በዘንባባ ዝንጣፊ፡ በእርግማን ምትክ በምርቃትና ምስጋና የሚቀበሉት መሪ(ዶ/ር አብይ) እንደሚሆን ቃል የገቡትበት ሰልፍ ነው። ታዲያ በደረቁ አመስግነው ብቻ አልተዉም። ”የተጀመረው ለውጥ ወደ ሽግግር ስርዓት እንዲያመራ በእርሶ ላይ ተስፋ ጥለናል።” የምትል በአደራ የተቋጠረች የቤት ስራም ለዶ/ር አብይ ሰደዋል።

በየዕለቱ የሚሰሙ አስገራሚ ነገሮች ቀጥለዋል። ባድመን መልቀቅ እንደቅድመ ሁኔታ ሳያሰቀምጡ፡ ሶስተኛ ወገን ይዳኘን የሚል አቋም ሳይዙ የልዑካን ቡድናቸውን ወደ አዲሰበባ እንደሚልኩ የገለጹት የኤርትራው ፕሬዝዳንት ኢሳያስ አፈወርቂ ትላንት ቱባ ባለስልጣናቶቻቸውን ሰደው ተአምር ሲያስብሉኝ ነው የዋሉት። በጉዳዩ ላይ የምርና ቁርጠኛ ውሳኔ ለመድረሳቸው የላኳቸው ባለስልጣናት ስብስብ በግልጽ የሚያሳይ ነው። ዶ/ር አብይም ለእኚህ ከፍተኛ የኤርትራ ባለስልጣናት ያደረጉት አቀባበልና በቤተመንግስት ያደረጉት ስነስርዓት አፍን በአግራሞት የሚያሲይዝ ነው። እንደዛ የጠበቀ ካለ አላውቅም። ታምራት ገለታ በዚህ ጉዳይ ላይ ጥንቆላው ተሰምቶ ከሆነ እኛ ዘንድ አልደረሰም። ያልተጠበቀ፡ በቅርብ ዘመን ይሆናል ተብሎ ያልታሰበ ነው የሆነው።

ለእኔ በመሀሙድ አህመድ ”ሰላም” ዜማ እጅ ለእጅ የተያያዙት የአንድ አፈር ልጆች ሁኔታ የደስታ እምባ ወደውስጥ እንድለቀው አድርጎኛል። መጪው ቅዱስ ዮሀንስ አስመራና አዲስ አበባ እንደሚከበር ዶ/ር አብይ ሲናገሩ ደግሞ ጆሮዬን ተጠራጠርኩ። ፈጣሪ ሊታረቀን ይሆን? አስመራ በአበባይሆሽ ዘፈን ስትቀልጥ ታየኝ። የካዛንቺስ መሽታ ቤቶች በሄለን መለስ ‘ፍርፍር’ ዘፈን ሊደምቁ ነው ማለት ነው? በእርግጥ አስመራ ለኢትዮጵያ ሙዚቃዎች እንግዳ እንዳልሆነች አውቃለሁ። በኢትዮጵያ ጭፈራ ቤቶች የኤርትራ ዜማዎችን ማድመጥ አዲስ ነገር አይደለም። አሁን የሚለየው ሰላም፡ ፍቅርና አንድነት በሁለቱ ሀገራት መሀል መደመራቸው ነው። አሁን ሙዚቃዎቹ ትርጉም አላቸው። የጥላቻው ግድግዳ ተደርምሶ የሚደመጡ መሆናቸው ጣዕማቸው የሙዚቃ ብቻ ሆኖ ከጆሮ አይገቡም። ከልብ ዘልቀው ስለሁለቱ ሀገራት የአንድነት ማህተም ያኖራሉ። የ2011 አዲስ አመት ዋዜማውን ከአስመራ ኩምቢሽታቶ፡ ሰምበል ማይተመናይ፡ ገጀረት አሳልፎ በማግስቱ የእንቁጣጣሽ ዕለት ወደ ሸገር ብርርር….

በእርግጥ የዶ/ር አብይ የይቅርታና መደመር አዲስ መንፈስ አወንታዊ ለውጦችን በያቅጣጫው እያስመዘገበ መሆኑን መታዘብ ይቻላል። ”መደመር” የሚለው አሮጌ ቃል፡ አዲስ የመንፈስ ስጋ ለብሶ በኢትዮጵያ ሰማይ ላይ ደምቆ ይሰማ ከጀመረ ሳምንታት ተቆጠረዋል። ግን ‘መደመር’ ምንድን ነው? በዚህን ወቅት በኢትዮጵያውያን ዘንድ አብዝቶ ከአፍ የማይጠፋ ሆኗል። ሀሳቡም በተስፋ ተለብጦ በኢትዮጵያ ምድር ከጫ እስከጫፍ ጎሎቶ የሚሰማ የጊዜው ‘ንጉስ’ ቃል ለመሆን በቅቷል። ”ተደመረ” ማለት በዶ/ር አብይ ኢትዮጵያዊ ራዕይ ተማርኮ፡ እጅ ሰጥቶ፡ ለለውጥ ተነሳ ማለት ነው የሚል ትርጉም ይዞ እዚህም እዚያም፡ የጨዋታ ማጣፈጫ በመሆን እያገለገለ ነው። ይህ ጥሩ ነገር ነው። የሚሊዮኖችን ቀልብ የሳበ፡ ተስፋንም የሰነቀ ነውና። ግን ደግሞ ወረት ሆኖ እንዳይቀር ስጋት አለ። ከዚያም ባለፈ ‘መደመር’ የሚለው ቃል ከሚገባው በላይ ተለጥጦ የተዛባና ፈጽሞ ተቃራኒ የሆነ ውጤት እንዳያመጣም የታሰበበት አይመስለኝም።

አዎን! መደመር ሲባል ድንበር የለውም? ስነስርዓት የለውም? ህግና ደንብ ሳይኖረው: መልክና ቅርፅ ስይበጅለት: ዝም ብሎ መደመር ነውን? ስንዴ ከእንክርዳዱ: ፍሬ ከገለባው: ጥሩውና መጥፎው: ፉንጋውና ሰልካካው: አደርባዩና ሃቀኛው ሳይለዩ: ወሰን ሳያበጁ መደባለቅም ማለት ነው? እንዴት ነገሩ? በመደመር ሂሳብ ንጹህ ከቆሻሻው የማይለይበት፡ ጻድቃን ከሃጥአን የተዋሃዱበት፡ ገራፊውና ተገራፊው የተቃየጡበት፡ ሰነፍና ጎበዝ አንድ የሆኑበት፡ ዘራፊው ደረቱን ገልብጦ የሚፈነጭበት፡ ሞራል አልባው አይኑን በጨው አጥቦ የሚፎልልበት፡ የህሊና ደሀው ፊት መስመር ተሰልፎ የሚፎክርበት …..ከሆነ ምኑ ነው ለውጡ? ቁልቁል መደመር፡ በዜሮ መባዛት፡ ለምን ተፈለገ?

የዶ/ር አብይና የኤርትራ ባልስጣናት የቤተመንግስት ትዕይንትን ከተመለከትኩ በኋላ ይህን ጽሁን እንዳዘጋጅ ውስጤን ገፋፋው። እውነት ለመናገር የዶ/ር አብይ የ’መደመር’ አብዮት ፈሩን እየሳተ፡ በሆይ ሆይታና ግርግር የታጀበ፡ በማይደመሩ ሰዎች በዜሮ እየተባዛ፡ በሂደትም ትርፉ ሀገራዊ ወደ ሆነ ኪሳራ እንዳያመራ በጽኑ እሰጋለሁ። ሟርተኛም ካሰኘኝ..ግድየለም ልሁን። ፖለቲካ ብዙ ቅንነት፡ ትንሽ ተጠራጣሪነት ያስፈልገዋል። ፖለቲካ የፍቅር ቲያትር አይደለም። በይቅርታ ጀምሮ በይቅርታ የሚጠናቀቅ፡ ፍቅር ብቻ የሞላበት፡ የዋህነት፡ ደግነት፡ መልካምነት እንጂ ሌላ ነገር የማይነካካው አይደለም። ቅዱስ መጽሀፉም እንደእርግብ የዋህ፡ እንደእባብ ልባም ሁን ይላል። እሾህ በሞላባት፡ አሜኬላው በየሜትሩ በወደቀባት፡ የሞራል ኮምፓሷ በጠፋባት በዚህች ዓለም፡ አልፋና ኦሜጋው ፍቅር ብቻ የሆነበት የፖለቲካ ስትራቴጂ የጠዋት ጤዛ ነው። እድሜ አይኖረውም።

ስንቱን የኪነጥበብ ሰው ያፈራች፡ አንጋፋና ስብዕናቸው የገዘፉ፡ በአርያነታቸው ከፍ ብለው የሚነሱ፡ ስማቸውን ጠርተን የምንጠግባቸው ስንት ዕንቁ የጥበብ ሰዎች እያሉ ሰራዊት ፍቅሬ የተባለ፡ ሞራል የደረቀበት፡ ነውር የማይፈራ፡ ሰውነቱን አራግፎ የጨረሰ፡ የመጥፎ ስብዕና መገለጫ የሆነ ግለሰብ በመደመር ሂሳብ ዘንድሮም ከፊት ተሰልፎ ስመለከተው እውነት ለመናገር አቃረኝ። ከመንደር አስተሳሰብ ያልወጣን፡ ኢትዮጵያውያንን በዘርና በጎሳ ሸንሽኖ ሲያባላ ኖሮ ኢትዮጵያዊ መሆን አቅቶት፡ ቁልል መከራ አሸክሞን፡ በጭካኔ በትር ሲቀጠቅጠን ኖሮ ዘላለማዊ ሞቱን የጨለጠውን መለስ ዜናዊን ”የሙሴ በትር” እያለ ያዜመን ነዋይ ደበበ የተባለን ዘፋኝ የአዲሲቷን፡ የተደመረች ኢትዮጵያን ወክሎ መድረክ ላይ ሲንጎማለል እንደማየት ተስፋ የሚያስቆርጥ ምን ነገር አለ?

እንደሰማነው አርቲስት ቴዎድሮስ ተሾመ የተባለ በቀደመው የህወሀት አገዛዝ መሬት የጠበበው ሰው ከዶ/ር አብይ ጋር አፈር ፈጭቶ ያደገ ወዳጅ ነው። በአብሮ አደግነት ስሌት በዶ/ር አብይ ተመርጦ ወደፊት እንዲመጣና የአርቲስቶችን ጉዳይ እንዲመራው የተመረጠ እንደሆነም ይነገራል። ዶ/ር አብይ በዚህ አንጻር ትልቅ ፋውል ሰርተዋል። የህዝብ አመኔታን ያጡ፡ ባትሪያቸውን የጨረሱ፡ ህሊና የሚባል ትንሹ እግዚያብሄር ያልፈጠረባቸው፡ አክሮባት መስራት፡ መገለባበጥን የህይወታቸው መርህ ያደረጉ፡ በአጭሩ ህዝብ የሚጠየፋቸውን ሰዎች ከአጠገቡ መሰብሰብ በጣም አደገኛ አካሄድ ነው። አርቲስት ቴዎድሮስ በሰፈር ልጅነት ያገኘውን መድረክ ብጤዎቹን መሰብሰቢያ አድርጎት አርፏል። የኢትዮጵያ ህዝብ በጸሎቱ ፈጣሪ እስከወዲያኛው ያለያየውን መለስ ዜናዊን ጥቁር አዘቅዝቀው፡ ማቅ ለብሰው ”ምነው ተለየሀን፡ መስከረም ሳይጠባ” የተሰኘውን ታላቅ ዜማ አርክሰው በህብረት እያዜሙ፡ እንባ እየተራጩ የሸኙ አርቲስቶችን ለዶ/ር አብይ ተስፋ ሰጪ የመደመር አብዮት አድማቂ አድርጎ ከፊት ሲያመጣቸው ውስጤ በቁጭትና ንዴት በግኗል። ከዚህ ዓይነቱስ መደመር አንደኛውን ተቀንሶ የዳር ተመልካች መሆኑ ሳይሻል አይቀርም?

ገና በጠዋቱ፡ በመለስ ጉትጎታ ኤርትራ በህዝበ ውሳኔ ከመለየቷ በፊት አስመራ ድረስ ሄደው በአማራው ህዝብ ስም ”በድለናችኋል፡ ይቅር በሉን” የሚል የውርደት ታሪክ ፈጽመው በዚህ አሳፋሪ ተግባራቸው ማፈርና ሲገባቸው እንደጀግና እየተንጎራደዱ የሚፎልሉ፡ ሰው ዘንድሮም የኢትዮጵያና የኤርትራ የሰላም ስምምነት ዋና ተንታኝ ሆነው በቴሌቪዥን መስኮት ሳያቸው አሁንስ ይሄ ‘መደመር’ ሃዲዱን ስቶ ከገደል እንዳይወስደን አስባለኝ። አቶ ታደለ ይመር በአደርባይ ባህሪያቸው የሚስተካከላቸው የለም። አስመራ ድረስ ሄደው በአንድ ህዝብ ስም ይቅርታ የጠየቁበት አስቀያሚ መልካቸውን ሳይቀይሩት፡ በሁለቱ ቀደምት ምርጫዎች የሀገር ውስጥ ታዛቢዎች ማህበር ወንበር ላይ ፊጢጥ ብለው ተቀምጠው የአደርባይነት ታሪካቸውን ደገሙት። ህወሀት በዓለም ዓቀፍ መድረክ ጨፍጫፊነቱ የተጋለጠበትን የ1997 ምርጫ ”ሰላማዊ” ሲሉ በታዛቢዎች ስም መግለጫ ሲሰጡ ሳይ አንድ ሰው በአደርባይነት እስከየት ጥግ ሊሄድ ይችላል ስል ራሴን ጠየኩ።አሁንም ህወሀት በተዋረደበት የ2002ቱ ምርጫ 100 ፐርሰንት አሸነፍኩ ብሎ ፓርላማውን ሲቆጣጠር እኚሁ ሰዉ ዳግም ብቅ ብለው በተመሳሳይ ቆብ ምርጫው ”ፍጹም ዲሞክራሲያዊ ነው” ሲሉ ተናገሩ። ሰውዬው ሀፍረት አልፈጠረባቸውም። ለልጆቻቸው አዘንኩ። ምን ዓይነት አባት አለን ብለው እንደሚናገሩ አላውቅም። እኚሁ የአደርባይነት ተምሳሌት የሆኑ ግለሰብ ዘንድሮም በመደመር ሂሳብ ከፊት መጥተው እየደሰኮሩ ነው።

በመደመር አብዮት ተንገዋለው ወደ ኋላ ይቀራሉ ያልናቸው ግለሰቦች በተቃራኒው ከፊት ተሰልፈው ስናያቸው የዶ/ር አብይ ተስፋ ሰጪ አካሄድ ላይ መጥፎ አሻራ እንዳያኖሩ ስጋት ገብቶኛል። ዶ/ር አብይ ስራ ስለሚበዛባቸው ይሄን ሁሉ ጉዳይ ውስጥ ገብተው ውሳኔ እንዲሰጡ አይጠበቅም። ግን ደግሞ በመደመር ሂሳብ አጨብርባሪዎች መድረኩን ሲቆጣጠሩት ማየት የሚታገሱት ነገር አይደለም። እነዚህ ሰዎች ለራሳቸው ክብር የሌላቸው ናቸው። ለዚህ ዓይነቱ ሀገራዊ አብዮት የሚመጥን ስብዕና የላቸውም። ህዝብ ላይ ላደረሱት የሞራል ኪሳራ ይቅርታ ሳይጠይቁ ከመንጋው ጋር ተቅላቅለው፡ ብሎም ፊት መሪ ሆነው ሲመጡ ማየት በእጅጉን ያሳፍራል። እንደነዚህ ዓይነት ሰዎች ባይደመሩስ?

ልቤ በተስፋ በርቶ እነዚህን ሰዎች ስመለከት ቅጭም ይልብኛል። ደስታዬ እንደጉም በኖ ይለየኛል። የዶ/ር አብይ ራዕይ በእነዚህ የሰውነት ባህሪያቸውን ባጡ ሰዎች የተነሳ ይጨናገፋል የሚል እምነት የለኝም። ግን ከመድረኩ ዞር እንዲሉ እፈልጋለሁ። በጽኑ እሻለሁ። ልጆቻችን ከዚህ ምን እየተማሩ ያድጋሉ? ለነገው ትውልድ የምናስብ ከሆነ የሞራል ክስረት የገጠማቸውን ሰዎች እያመጡ መሸልምና ማወደስ ትልቅ ስህተት ነው። ልጆቻችን በሀቀኝነት ሀገራቸውን ከሚያገለግሉ እንጂ ‘በእንብላውና’ እንጋጠው ማህበር ከተሰበሰቡ የቀን ጅቦች የሚቀስሙት አንዳችም መልካም ነገር የለም። መገለባበጥን እንጂ እውነትን አይማሩም፣፡ አደርባይነት እንጂ ለመርህ መቆምን አይመርጡም። በመጥፎ አረያነት ልጆቻችንን የሚያበላሹ የትውልድ ጸር መሆናቸው ሊታወቅ ይገባል። ዶ/ር አብይ የመደመር አብዮትዎን በሚገባ ይፈትሹ። እነዚህን ሰዎች ከፊት እያሰለፉ መደመር አይኖርም። መቀነስ እንጂ። የእርስዎ ቅጥር በእነዚህ ሞራል አልባ ሰዎች አይወረር። እውነት ለመናገር እንዲህ ዓይነት መደመር የትም አያደርስም። በየቤቱ አንገቱን የደፋ ስንት ድንቅ የጥበብ ባለሙያ አለና እነሱን ይፈልጉ። አዲስ ፊት ለአዲስ ራዕይ።

2 COMMENTS

  1. ይኼውና ዓይን-በቁና-ሰፋሪ።
    xxxxxxxxxxxxxxxxx
    በዚህ የግልምብጥ የተረገመ ዘመን፤
    በማሕበራዊ ቁስ፣
    በሞት ውልደት ታመን፤
    በዕርቅና በሰላም፣በትዕግስት ደክመን፤
    ባለፉት ጥፋቶች በይቅርታ ቆመን፤
    ምልክቱን ዓየን ይመስላል ጨናዊ፤
    እንደዚያ እርጉሙ ወቸገል ዜናዊ።
    ራሳቸው ገድለው አብረው የሚያለቅሱ፤
    እያወናበዱ ህዝብን ያስጬረሱ፤
    እናውቃቸዋለን ጉጅሌና ባንዳን፤
    ስንቴ እየተገደልን በእነሱ ተጎዻን።
    ማን እንዳስገደለን ማንስ እንደከዳን፤
    በደምብ ይታወቃሉ ሰሞኑን ታይተዋል፤
    ጉጅሌዎች ሆነው ለምንስ ይተዋል?
    የባሰውን መግደል ነገ ሳያመጡ፤
    ወደ ሕዝብ ለመግባት
    ከፓርቲ ልብ ይውጡ።
    ከዚያ የሰቆቃ ዘመን ዛሬም ሳንወጣ፤
    ዓይን በቁና ሰፋሪ፣
    ይኼውና መጣ።
    በእግዚአብሔር በፍፁም ባይቆረጥ ተስፋ፤
    ትንቢትም ሲፈፀም፤እያየን በይፋ፤
    በዕድሜአችን ስንጓጓ፣ቤተክ’ስቲያን ስንስም፤
    ስንለምን ፈጣሪን በቅዱሳኖች ሥም፤
    እባክህ አውጣን ስንል ከሞት ከግፍ ጣጣ፤
    ዓይን በቁና ሰፋሪ፣
    ይኼውና መጣ።
    ይምጣ የት አባቱ፣ሠይጣን እንደው ያውነው፤
    ዲያቢሎስ አጋንንት፣ያልነው።
    ርኩስ መንፈስ ሁሉ አንድ ነው ስራቸው፤
    በግብር ቢለያዩ ሁሉም ርኩስ ናቸው።
    ለዚህ ነው ጾም ፀሎት ስግደት የሚፈሩት፤
    የሰው-ሥጋ ተጣብቀው፣ግፍን የሚያሰሩት።
    እናም ወቸገሉ በቅሥፈት ሲቀጣ፤
    ዓይን በቁና ሰፋሪ፣
    ይኼውና መጣ።
    ራሳቸው ገድለው አብረው የሚያለቅሱ፤
    እያወናበዱ ህዝብን ያስጬረሱ፤
    እናውቃቸዋለን ጉጅሌና ባንዳን፤
    ስንቴ እየተገደልን በእነሱ ተጎዻን።
    ማን እንዳስገደለን ማንስ እንደከዳን፤
    በደምብ ይታወቃሉ ሰሞኑን ታይተዋል፤
    ጉጅሌዎች ሆነው ለምንስ ይተዋል?
    የባሰውን መግደል ነገ ሳያመጡ፤
    ወደ ሕዝብ ለመግባት
    ከፓርቲ ልብ ይውጡ።
    ይምጣ ማን ይፈርል፣ማን ጊዜን ይዳኛል፤
    ጊዜው ራሱ መጥቶ ያሻውን ያገኛል።
    ሰው በመሆናችን፣አስበን እንደሰው፤
    በነፃነት ልንኖር፣ሕሊናን ስንለብሰው፤

    አምላክ ይናገራል በአንድም በሌላ፤
    መልካሙን ሊያሳየን ምንም ሳያዳላ።
    ስለዚህ ተስፋችን ከትግል ሲወጣ፤
    ዓይን በቁና ሰፋሪ፤
    ይኼውና መጣ።

  2. ይሄ ጉዳይ በጣም አሳሳቢ ነው።በአንድም ይሁን በሌላ መልክ ታሪክ ራሱን ይደግማል ነው የሚባለው አይደል ።ከአርቲስቶች ጋር ባይገናኝም አብዛኞቹ በወቅቱ የወያኔን ስርአት ደጋፊ ባይሆኑም ግን ከመለስ ዜናዊ ጋር ፎቶ በመነሳታቸው ምን ያህል ተናደን እና አዝነንባቸው እንደነበር አስታውሳለሁ።የአዲስ አበባ የኒቨርስቲ መምህራኖች ያ ፎቶ እኛ ከምንጠላው መሪጋር በመነሳታቸው ነበር።ደግሞ ፍቶ ለመነሳት ሲሽቀዳደሙ ሲታዩ እንዴት ያሳፍሩ ነበር መሰለህ።
    የአሁኑ ምሁራን ባይሆኑም በአጠቃላይ አርቲስት አድርባይ ከመጣው ከሄደው ጋር እየተካከኩ ፎቶ በመነሳት ትልቅ የሆኑ የሚመስላቸው ለሀገርም ሆነ ለህዝብ ምንም ደንታ የሌላቸው አሽቃባጮች ለጊዜውም ቢሆን ባነሳሀው የለውጥ ሀሳብ የህዝብ ፍቅርን ያገኘ እና አላማውና አካሄዱ እነዚህ ዘረኞች ካዘጋጁት ዘግናኝ እልቂት እና ደም መፋሰስ ባልገመትነው እና ባልጠበቅነው ሁኔታ ነገሮችን ቀልብሶ በፍቅር በይቅርታ እና በምህረት ከጫፍ እስከ ጫፍ ህዝባችንን አንድ ያደረገ መሪ ጋር በአይን አውጣነት ፎቶ መነሳታቸው ምን ያህል ለህዝባችን ንቀት እና ጥላቻ ያላቸው ።ከዚህ አስከፊ ስርአት ለመላቀቅ በርካታ ውድ የኢትዮጵያ ልጆች ተውኔት ሳይሆን እውነተኛ ግፍ እና መከራ የተቀበሉባት አካላቸው የተቆረጠበት መውለድ እንዳይችሉ የተደረጉበት አይናቸው የተጎለጎለበት ከአንድ ቤተሰብ ሁለት እና ሶስት ሰዎች እናቶች ምንም የማያውቁ ህጻናት እና ታዳጊዎች በስናይፐር አናታቸው የተበረቀሰበት።ያለምንም ከኖሩበት ሰፈር በአፍራሽ ግብረ ሀይል ቤታቸው ላያቸው ላይ እንዲፈርስ የተደረጉባቸው በብዙ ሺህዎች ቤት አልባ ሆነው ወደጎዳና በአስከፊው የክረምት ብርድ የተጣሉባት ሀገር ህዝብ ሁሉን ነገር ትቶ ሀዘኑን እና የደረሰበትን ችግር እና መከራ ውጦ በአንድ ልብ በአንድ ሀሳብ ለነገ የተሻለን በማሰብ አዲስ አበባን በፍቅር በሰላም ያጥለቀለቀባት ህልምና ምኞቱ ከዳር እንዲደርስ ከጎኑ መሆኑን ያረጋገጠለት ያ መሪ ከነዚህ ውሾች እና አድርባዮች መሀከል መገኘት የተጀመረው የይቅርታ እና የምህረት የአንድነት ጉዞ የተቀለበስ ያህል ሆኖ ነው የሚሰማኝ።ከነርሱ መሃል እኮ በማጭበርበር ወንጀል ተከሶ ፍርድ ቤት እንዲከፍል የተወሰነበት ሌባ ሁሉ አለ።ልጅትዋ አቅም ስለአላት ተሟግታ መብትዋን አስከበረች እንጂ ብዙ ተበልተው ገንዘባቸው የቀለጡ ሰዎች ይኖራሉ።
    ዶክተር አቢይ በሰላማዊ ሰልፍ እንዲያውም አንዱ አንተን ለማዳን ብሎ በተወረወረ ቦንብ የሞተ መሆኑን ብዙዎቹ የአካል ጉዳት የደረሰባቸው መሆኑ እየታወቀ አንተ ከነዚህ አርቲስቶች ጋር መዝፈን እና መጨፈር አይገባህም እንዲያውም ማድረግ ያለብህ የህሊና ጸሎት ነበረ።ይሁን ሰው ያከበርክ መስሎን ነበረ።አዎ በዚሁ የምትቀጥል ከሆነ የተጀመረው የነጻነት ትግል እንደነዚህ ልፍስፍስ ሆዳም አድርባይ ደደብ አርቲስቶች ትግሉ ተጠልፎ አንተንም እንዳያስከፍልህ በቅርቡ ዝነኛው አርቲስት ደበበ ሰይፉ ጅቡን በልተን አብረን ብንቀደስ ይሻላል ለጅቡ ጊዜ ሰጥተህ አንተንም ሆን ትግሉን ከመብላቱ በፊት ።አዎ ርእዮት አለሙም የተናገረችውን በንጽጽር በደርግ መውደቂያ ጊዜ አንድ ጋዜጠኛ በአዲስ ዘመን ላይ በቀናት ልዩነት ምን ያህል ይቀላምድ እንደነበረ እና እንደነዚህ አይነ ች የዘመናችን ባንዳዎች ለሰላም ለፍትህ ለነጻነትእየከፈለ ያለውን መስዋእትነት እና እያስመዘገበ ያለውን ድል ከመዋጡ በፊት የፎቶ መነሳት ፕሮግራምህን ቀንሰህ እያንዳንዱ ቦታ ላይ እየተገኘህ ሁለገብ መምህርነትህን አቁመህ በሙያው ለሚፈለገው ትምህርትም ሆነ ስልጠና ባለሙያዎችን ተክተህ በነዚህ በሀያ ሰባት አመት ለሀገራችን ሰላምና ዲሞክራሲን ለማምጣት ከተሰደዱ ከታሰሩ ተፎካካሪ ፓርቲዎች ጋር ውይይት በማድረግ የሽግግር መንግስት ምስረታውን ብታፋጥን ጥሩ ነው ተፎካካሪ ስንል እንደነ ልደቱ ህዝብ አንቅሮ የተፋቸው ባገኙት ጊዜና አጋጣሚ ማሊያ ቀይረው በምላስ ጨዋታ ከሚጫወቱ ጋር እንዳልሆነ እንዲታወቅልኝ እፈልጋለሁ።ህዝቡም ያውቃቸዋል።አዎ በመጨረሻ ሀብታሙ አያሌውም ስለነዚህ አርቲስቶች በደንብ ተናግሮአል ።ዶክተር ጊዜ የለንም በዚች በአሁኑ ሰአት ህዝባችን ላይ በተለያየ ቦታ የደገሱት እልቂት ፍሬውን እያየን ነው ወደለየለት ፍጅት ከማምራቱ በፊት የዚህን ጠንሳሾችእንቅስቃሴ ገድብ ህዝብህን አድን ዲሞክራሲን ጠብቅ።ከሁሉ በላይየህዝባችን ሰላም ይናፍቀኛል ፥

LEAVE A REPLY

Please enter your comment!
Please enter your name here