Home Poems እንኳን ደህና መጣህ! – ለጠ/ሚ አቢይ የአሜሪካ ጉብኝት

እንኳን ደህና መጣህ! – ለጠ/ሚ አቢይ የአሜሪካ ጉብኝት [ጌታቸው አበራ]

እንኳን ደህና መጣህ!

(ለክቡር ጠ/ሚ ዶ/ር ዐቢይ አሕመድ የሰሜን አሜሪካ ታሪካዊ ጉዞ ማስታወሻ)
ባገር-ወገን ክብር ቅን ልብህ የፈካ፣
የፍቅር፣ የሰላም፣ የአንድነት.. ዋርካ፤
ወገን አለኝ ብለህ ባሕር-ማዶ ዘልቀህ፣
ልታየን የጓጓህ – እንኳን ደህና መጣህ!
ግንቡን አስፈርሰህ – ድልድይ ልትዘረጋ፣
ለመሸጋገሪያ – ወደ ላቀ ጸጋ፣
ለኢትዮጵያችን ክብር – አርቀህ በማሰብ፣
የጠፉትን በጎች – ከዓለም ልትሰበስብ፣
በክንፍህ ጥላ ስር – ሁሉን ልትደምር፣
ህብረ-ብሔራዊ – ዜማን ልታዘምር፤
እንኳን ደህና መጣህ! – በድሉ ጎዳና፣
የጀግና አቀባበል – ይገባሃልና!
ያርባ ዓመት ታሪክ..
በሦስት ወር የቀየርክ፣
አንተ የልብ ሐኪም – ያገር ሕይወት ቤዛ፣
ግብርህም ይባረክ! – በረከተህ ይብዛ!
ክፋት፣ ምቀኝነት..፣ ጥላቻን.. ሰርዞ፣
መከባበር፣ ኅብረት..፣ ዕድገት፣ ጥበብ.. ይዞ፤
የተሳካ ይሁን! – የጀመርከው ጉዞ።
የድንቅ የውብ አገር – የታላቅ ሕዝብ መሪ
አዲስ ባለራዕይ – ደማቅ ታሪክ ሰሪ፣
የዜጎችህ ኩራት – የወገን አለኝታ፣
ሁሉ ይስመርልህ – በሄድክበት ቦታ፤
ይጎዝጎዝ ቄጠማ – ይበተን አበባ፣
የደስታ ቀን ይሁን – አንተ ስትገባ፤
ወርቀ-ዘቦ ምንጣፍ – ይዘርጋ ለክብርህ፣
ዐቢይ ኢትዮጵያዊ – እንኳን ደህና መጣህ!
ጌታቸው አበራ
ሐምሌ 2010 ዓ/ም

LEAVE A REPLY

Please enter your comment!
Please enter your name here