Home News and Views በመቀሌ ገዳይ አፍቃሪና ሌባ አስጥል ሰልፍ ተካሄደ

በመቀሌ ገዳይ አፍቃሪና ሌባ አስጥል ሰልፍ ተካሄደ

የህወሓት አመራሮችና አፈ-ቀላጤዎች በዛሬው ዕለት “መሬት አንቀጥቅጥ” የሆነ የድጋፍ ሰልፍ በመቀሌ ከተማ እየተካሔደ ነው። እነዚህ የህወሓት ካድሬዎች በኢትዮጵያ ህዝብ ላይ ለማመን የሚከብድ በደልና ስቃይ ሲፈፅሙ የነበሩ ሌቦችና ጨካኞች አሊያም ለዚህ እኩይ ምግባራቸው ጥብቅና የቆሙ ህሊና-ቢስ የሆኑ ሆድ አደሮች ናቸው። ላለፉት 27 አመታት በኢትዮጵያ ሰማይ ስር ቅጥ-ያጣ ዘረፋና ጭካኔ የተሞላው ተግባር በመፈፀማቸው ለውርደትና ውድቀት የተዳረጉ፤ የተቀረው ዓለም በገዛ ሀገራቸው ላይ በፈፀሙት ግፍና በደል አንቅሮ የተፋቸው፣ ከኢትዮጵያ ውጪ መሸሸጊያ ጥጋት የሌላቸው፣ ከህግና የህሊና ፍርድ ለማምለጥ ወደ ትግራይ በመሸሽ በመካከላችሁ የተደበቁ ጉዶች ናቸው።

በተመሳሳይ ባለፈው ሳምንት በቤኒሻንጉል-ጉሙዝ ክልል እነሱ በቀሰቀሱት ግጭት ብዛት ያላቸው የአማራና ኦሮሞ ተወላጆች በተገደሉበት ሳምንት “በትግራይ ተወላጆች ላይ ያነጣጠረ የብሔር ጥቃት ይቁም” በሚል ሰላማዊ ሰልፍ መጥራታቸው ይታወሳል። ወጣቶችን የጦር መሳሪያ አስይዘው አደባባይ እንዲወጡ ካደረጉ በኋላ በተለያዩ የክልሉ ከተሞች “ሰላማዊ ሰልፍ ተደረገ“ የሚል ዲስኩር አሰሙ። አዛውንት እናቶችን በትልቅ ጎራዴ ላይ የትግራይን ባንዲራ እያውለበለቡ እንዲወጡ አድርገው አረንጓዴ፥ ቢጫ፥ ቀይ ባንዲራ አክሱም ጹዮን ቤተ-ክርስቲያን ውስጥ እንዳይውለበለብ ከልክለዋል። እናቶችን በአደባባይ ጦርነት እንዲቀሰቅሱ የሚያደርጉ፣ ቤተ-ክርስቲያን ውስጥ ስለ ሰላም እንዳይፀልዩ የሚያውኩ፣… ፈሪሃ-እግዚያብሔር የሌለባቸው፣ የሰይጣን መንፈስ የተጫናቸው ክፉዎች ናቸው።

የትግራይ ህዝብ ሆይ…. የህወሓት ካድሬዎችና የእነሱ ድቀመዛሙርት፤ ከኢትዮጵያ ህዝብ የዘረፉት ሃብት መላ ያሳጣቸው፣ የንፁሃን ደምና እምባ ያሰከራቸው፣ ህሊናቸው ታውሮ ማስተዋልና ማመዛዘን የተሳናቸው፤ ጥሩና መጥፎ፣ ትክክልና ስህተት፣ ሥራና ወንጀል፣ ሰላምና ጦርነት የተምታታባቸው ድኩማኖች ናቸው። ባለፉት ወራት በተግባር እንደታዘብነው፤ እነዚህ ሰዎች “የድጋፍ ሰልፍ” የሚጠሩት ሽንፈትና ውርደታቸውን ለመሸፋፈን፣ “የተቃውሞ ሰልፍ” ሲጠሩ ደግሞ ለትግራይ ህዝብ መልካም የሆነን ነገር ለማስተጓጎል እንደሆነ መገንዘብ ያስፈልጋል።

LEAVE A REPLY

Please enter your comment!
Please enter your name here