Home News and Views በመተከል ዞን ድባጤ ወረዳ ከቀያቸው የተፈናቀሉ ነዋሪዎች በምግብ፣ በአልባሳት እና በመጠለያ እጦት...

በመተከል ዞን ድባጤ ወረዳ ከቀያቸው የተፈናቀሉ ነዋሪዎች በምግብ፣ በአልባሳት እና በመጠለያ እጦት እየተቸገሩ መሆኑን ተናገሩ፡፡

የቤኒሻንጉል ጉሙዝ ክልል የአደጋ ስጋት ሥራ አመራር ኮሚሽን ለተፈናቃዮች ድጋፍ ማድረግ መጀመሩን ገልጿል፡፡
 ኅዳር 12/2013 ዓ.ም (አብመድ) የአማራ ብዙኃን መገናኛ ድርጅት ተፈናቃዮቹ ያነሱትን ችግር በተመለከተ ምላሽ ለማግኘት ኅዳር 11/2013 ዓ.ም ለክልሉ የሥራ ኃላፊዎች ስልክ ደውለን ምላሽ ማገኘት እንዳልቻልንና ጉዳዩን ተከታትልን ይዘን እንደምንቀርብ ዘግበን ነበር፡፡
በቤኒሻንጉል ጉሙዝ ክልል መተከል ዞን ድባጤ ወረዳ ሳምቦሰሪ፣ አልባሳን፣ ጋፋሪ፣ ሙዘን፣ ቆርቃ፣ ያምፕ፣ አዲስ ዓለም እና በሌሎችም ቀበሌዎች ንጹኀን አማራዎች ሞትና መፈናቀል ደርሶባቸዋል፡፡ ከሞት የተረፉትና ግድያውን ሸሽተው በድባጤ ወረዳ ጋሊሳ ቀበሌ እና በድባጤ ከተማ ትምህርት ቤት ውስጥ ተጠልለዋል፤ በምግብ፣ በአልባሳት እና መጠለያ እጦት እየተቸገሩ መሆኑን ለአብመድ ተናግረዋል፡፡
በጉዳዩ ላይ የተጠየቀው የቤኒሻንጉል ጉሙዝ ክልል የአደጋ ስጋት ሥራ አመራር ኮሚሽን ለተፈናቃዮች አስቸኳይ ድጋፍ እየተደረገ መሆኑን አስታውቋል፡፡
የክልሉ የአደጋ ስጋት ሥራ አመራር ኮሚሽነር ታረቀኝ ተሲሳ ለተፈናቃዮች አስቸኳይ ድጋፍ እየተደረገ መሆኑን ተናግረዋል፡፡ ኮሚሽነሩ እንዳሉት ከኅዳር 5/2013 ዓ.ም ጀምሮ ከተለያዩ ቀበሌዎች ተፈናቅለው በድባጤ አጠቃላይ ሁለተኛ ደረጃ ትምህርት ቤት ለሚገኙ 1 ሺህ 200 ተፈናቃዮች 180 ኩንታል እህል እና 20 ኩንታል የህፃናት አልሚ ምግብ እንዲሁም ሦስት ቦንዳ ልብስ እንደተሰጣቸው ተናግረዋል፡፡
በድባጤ ቀበሌ ለሚገኙት ትላንት ምሽት 5፡00 ጀምሮ 233 ኩንታል እህል፣ 50 ኩንታል የህፃናት አልሚ ምግብ እና አምስት ቦንዳ አልባሳት በጉዞ ላይ እንደሆነ ኮሚሽነሩ ገልጸዋል፡፡
ከዕለታዊ ድጋፍ በተጨማሪ ተፈናቃዮቹን በዘላቂነት ለማቋቋም ቀጣናው በኮማንድ ፖስት እየተመራ እንደሆነ ኮሚሽነር ታረቀኝ አንስተዋል፡፡
ተፈናቃዮች ወደ ቀያቸው እንዲመለሱ ይደረጋል፤ መልሶ የማቋቋም ሥራም ይስራል ብለዋል፡፡
በአካባቢው ተጨማሪ ጥቃት እንዳይፈጸም ልዩ ትኩረት ተሰጥቶ እንደሚሰራ ኮሚሽነሩ ገልጸዋል፡፡ የአካባቢው ነዋሪዎችም የትህነግ ዘራፊ ቡድን ያሰረጸውን የመጠፋፋት ፕሮፓጋንዳ ወደ ጎን በመተው ለዘመናት አብረው ከኖሩ ህዝቦች ጋር ተሳስበው መኖር እንዳለባቸው አመላክተዋል፡፡
ዘጋቢ፡-አዳሙ ሽባባው

LEAVE A REPLY

Please enter your comment!
Please enter your name here