Home News and Views ብልጽግና፦የዶ/ር አቢይ ቀጣይ ራስ ምታት

ብልጽግና፦የዶ/ር አቢይ ቀጣይ ራስ ምታት

በለውጥ ሃይሉና በቀልባሹ(ወያኔ መራሹ) መካከል የነበረው ፍትጊያ የተጠናቀቀ ይመስላል። ይህ ማለት ግን ለውጡ በማይናወጥ መሰረት ላይ ተቀመጠ ማለት አይደለም። በርግጥ ወያኔ ከዚህ በኋላ ለዶ/ር አቢይ መንግስት ችግር አትሆንም።  በሷ ስፖንሰርነት እዚህም እዚያም ይፈነዳዱ የነበሩ ጸረ-ለውጥ እንቅስቃሴዎች አብረዋት ስለሚከስሙ ብልጽግና ጥቂትም ቢሆን ፋታ ያገኛል። ለግዜው እንደ ወያኔ ሊፈትነው የሚችል አቅም ያለው የውጭ ኃይል አይታይም። ይልቅዬ ብልጽግናን የሚያሰጋው ከራሱ ጓዳ የሚቀሰቀስ ችግር ይመስለኛል። ሰሞኑን የሚታየውም ይኸው ነው። በብልጽግና ጓዳ መተማመን የለም። የአላማም ሆነ የፍላጎት ተመሳሳይነት አይታይም። የጉዞ ጉድኝት እንጂ የልብ ጓደኝነት የለም።.…
አዎ የወያኔ ቀብር ገና በቅጡም ሳይጠናቀቅ በብልጽግና ማጀት የቅራኔ ምልክቶች እየታዩ ነው። የኦሮሞ ብልጽግናና የአማራ ብልጽግና ካድሬዎች አንድ ላይ የቆሙ አይመስሉም። በወልቃይት ጠገዴና በራያ ጉዳይ አንድ ገጽ ላይ አይደሉም። በየአጀንዳው መጓተት ይታያል። መናቆር … መወጋጋት… መላላጥ …

በምራቅ የተጣበቀ ሚመስለው ብልጽግና …

ለምሳሌ መከላከያ ሰራዊታችንና የአማራ ልዩ ኃይል በወያኔ ላይ በተጎናጸፉት አስደናቂ ድል ሁሉም ወገን ቢደሰትም፤ ድሉን ተከትሎ በሚሰማው ገድል ላይ ግን ልዩነት አለ። እነ እቶኔ ” ጉሮ ወሸባዬ በዛ!” ሲሉ ያሽሟጥጣሉ። እነቶኔም ደግሞ ሽሙጡን በቅናት መንዝረው “ጉሮ ወሸባዬማ የጀግና ወግ ነው!” ሲሉ ይኩራራሉ።  ሁለቱም ግን በአንድ ጣራ ስር አድረን፤ በአንድ ፕሮግራም ተቋጥረን፤ በአንድ ድርጅት ተማምለን በልጽገን እናበለጽጋችኋለን የሚሉት የዶክተር አቢይ ስብስቦች ናቸው።
ሰሞኑን ብልጭ ብልጭ ሲል የሚታየው የነዚህ ስብስቦች የውስጥ ቅራኔ የዶክተር አቢይ ቀጣይ ራስ ምታት እንደሚሆን ምንም ጥርጥር የለኝም። ቅራኔው የሚመነጨው ደግሞ ለብሄር ከሚኖር ተቆርቋሪነት በመሆኑ በብሄር መቧደን እስካልቀረ ድረስ የቅራኔው አለመጥፋትም ተፈጥሯዊ ነው ። መፍትሄው ይኽው ነው። በብሄር መቧደን መከልከል። የጎሳ ፖለቲካን በህግ ማገድ።
አለበለዛ ከሁሉም ቀድሞ የሚፈርሰው በምራቅ የተጣበቀ የሚመስለው ራሱ ብልጽግና ፓርቲ ነው። የብልጽግና መፍረስ ደግሞ እስካሁን ከገጠመን ችግር ሁሉ የባሰ .… ሊከተን ይችላል።
ዶ/ር አቢይ ሆይ እውነት እውነት እልዎታለሁ ! እናትየውን (ወያኔን) እንደገደሉ በነካ እጅዎ ልጇንም (የጎሳ ፖለቲካን) ካልገደሉ ኢትዮጵያም፤ ህዝቧም እርስዎም ሰላም አያገኙም።

LEAVE A REPLY

Please enter your comment!
Please enter your name here